شه‌هید عه‌لی فه‌قێ عیسا

شه‌هید عه‌لی فه‌قێ عیسا

شه‌هیدی نه‌مر کاک عه‌لی فه‌قێ عیسا، کوڕی سلێمان، ساڵی-١٣٤٢-له‌ گوندی ” کانیه‌ڕه‌ش“ی سه‌ر به‌ ناوچه‌ی بۆکان، له‌ بنه‌ماڵه‌یه‌کی هه‌ژار و زه‌حمه‌تکێش له‌ داوێنی پاکی دایکێکی ره‌نجبه‌ردا که‌وته‌ باوه‌شی دایک و نیشتمانی گه‌وره‌، کوردستان.

نه‌داریی بنه‌ماڵه‌که‌یان و ژیانی کوڵه‌مه‌رگیی گوندنشینیی رێگه‌یان نه‌دا کاکه‌ عه‌لی بچێته‌ خوێندنگه‌، هه‌ر بۆیه‌ وه‌ک زۆربه‌ی کیژ و کوڕانی نیشتمانه‌که‌مان له‌ نیعمه‌تی خوێندن بێبه‌ش بوو. کاک عه‌لی ته‌مه‌نی منداڵیی و مێرمنداڵیی خۆی به‌ کاری وه‌رزێریی و یارمه‌تیدانی بنه‌ماڵه‌که‌ی بۆ دابینکردنی بژیوی رۆژانه‌ی خۆیان، به‌سه‌ر برد. نه‌داریی و ژیانی وه‌رزێریی و گوندنشینیی نه‌ک هه‌ر نه‌بوونه‌ رێگر له‌به‌رده‌م گه‌شه‌کردن و پێگه‌یشتنی کاکه‌ عه‌لی دا، به‌ڵکو بوونه‌ هه‌وێنی گوورانی باوه‌ڕی ئایینیی و نیشتمانیی ئه‌و رۆڵه‌یه.

هێشتا هه‌ر تازه‌لاو بوو که‌ هه‌ستی به ‌ژێرده‌سته‌یی نه‌ته‌وه‌که‌ی و داگیرکراویی خاکه‌که‌ی کرد. ئه‌م هه‌سته‌ خاوێنه‌ رۆژ به‌ رۆژ له‌ قووڵایی ده‌روونیدا ره‌گی داده‌کوتا و په‌لوپۆی راداویشتن.

ساڵی-١٣٦٤-کاک عه‌لی وه‌ک مرۆڤێکی به‌ هه‌ست و رۆڵه‌یه‌کی فیداکار، چیتر نه‌یتوانی له‌ژێر ده‌سه‌ڵاتی پڕ له‌ سته‌م و زۆرداریی داگیرکه‌رانی کوردستان و رژیمی کۆماری به‌ناو ئیسلامییدا ژیان به‌رێته‌سه‌ر. به‌پێچه‌وانه‌وه‌ له‌بری ئه‌وه‌ پێشمه‌رگانه‌ هه‌ڵوێستی وه‌گرت و به‌ کرده‌وه هاته‌ ناو ریزه‌کانی به‌رگری له‌ خاکی کوردستان. هاوینی ساڵی-١٣٧٢-سه‌نگه‌ری پێشمه‌رگه‌کانی رێکخراوی خه‌بات،ی شۆڕشگێڕی کوردستانی وه‌ک پیرۆزترین و گونجاوترین سه‌نگه‌ری به‌رگری له‌ ئایین و نیشتمانی کورد هه‌ڵبژارد و له‌ ریزه‌کانی رێکخراوه‌که‌ماندا جێی شایانی خۆی کرده‌وه‌.

شه‌هید عه‌لی له‌ ماوه‌ی ژیانی پڕ له‌ شانازیی پێشمه‌رگایه‌تییدا له‌ دڵسۆزیی و گیانفیدایی و له‌خۆبوردوویی بۆ رێکخراوه‌که‌ی و رێبازه‌ خاوێنه‌که‌یدا گه‌یشته‌ لووتکه‌. ئه‌و رۆڵه‌یه‌کی وه‌فادار بۆ گه‌ل و نیشتمانه داگیرکراوه‌‌که‌ی، پێشمه‌رگه‌یه‌کی ئازا و لێوه‌شاوه‌ بۆ خه‌بات،ی شۆڕشگێڕ، مرۆڤێکی خوڕاگر، هاوبیرێکی پشوودرێژ و رووحسووک، که‌سێکی ئارام و له‌سه‌رخۆ بوو. کاکه‌ عه‌لی نموونه‌ی ره‌وشتبه‌رزیی، گوێڕایه‌ڵیی، به‌نه‌زمیی، دامه‌زراویی و ده‌ست و دڵپاکیی بوو. ئه‌و تایبه‌تمه‌ندییانه‌ وایان له‌ شه‌هید عه‌لی کردبوو که‌ له‌ ماوه‌یه‌کی زۆر که‌مدا بوو به‌ خۆشه‌ویستی هاوبیر و هاوسه‌نگه‌رانی.

کات به‌ره‌به‌یانی-٦-ی سه‌رماوه‌زی ساڵی-١٣٧٢-و شوێن گوندی ”برایم خه‌سار“ی ناوچه‌ی بۆکان بوو. پۆلێک پێشمه‌رگه‌ی رێکخراوی خه‌بات،ی شۆڕشگێڕی کوردستان پاش گه‌ڕانێکی درێژماوه‌ی سیاسیی- نیزامیی بۆ پشوودان و سانه‌وه‌ رۆژی پێشووتر ده‌چنه‌ ئه‌و گونده‌. له‌وکاته‌دا هێزێکی زۆر و ته‌یاری دوژمن که‌ ژماره‌یان ده‌گه‌یشته‌ سه‌دان جاش و پاسدار، به‌ چاوساغیی خۆفرۆشان و سیخوڕانی رژیمی کۆماری به‌ناو ئیسلامیی ئێران، ئابڵووقه‌ی ”برایم خه‌سار“ ده‌ده‌ن. ئه‌و هێزه‌ زۆر و پڕچه‌که‌ی دوژمن پاش دامه‌زران و کۆنتڕۆڵکردنی شوێنه‌ گرنگه‌کان، به‌ هه‌موو هێز و توانا و چه‌کوچۆڵیانه‌وه‌ هێرش ده‌که‌ن سه‌ر پێشمه‌رگه قاره‌مان و خه‌باتگێڕه‌کانی‌ خه‌بات و گونده‌که‌ ده‌ده‌نه‌ به‌ر هێرشی تۆپ و کاتیۆشا و خومپاره‌ و چه‌کی قورس و سووک.

رۆڵه‌ به‌ هه‌ڵمه‌ت و فیداکاره‌کانی خه‌بات،ی شۆڕشگێڕ ده‌موده‌ست له‌ جاش و پاسداره‌کانی دوژمن وه‌ده‌ست دێن و به‌رپه‌رچی هێرشه‌که‌یان ده‌ده‌نه‌وه. پاش شه‌ڕێکی ده‌سته‌ویه‌خه‌ و نابه‌رانبه‌ری دوو سه‌عاته‌، پێشمه‌رگه‌کان ئابڵووقه‌ی هێزه‌کانی دوژمن ده‌شکێنن و ژماره‌یه‌کی به‌رچاویان لێ ده‌کوژن و بریندار ده‌که‌ن و سه‌ره‌نجام به‌ به‌رچاوی خه‌ڵکی ”برایم خه‌سار“ه‌وه هێزه‌ زۆره‌که‌ی دوژمن ده‌ڕه‌تێنن و تێکیانده‌شکێنن و سه‌ریان پێ شۆڕ ده‌که‌ن.

به‌داخه‌وه‌ له‌ کۆتاییه‌کانی ئه‌و نه‌به‌رده‌ که‌موێنه‌یه‌دا و له‌ جه‌نگه‌ی تێکشکانی جاش و پاسداره‌کاندا، پێشمه‌رگه‌ی خۆشه‌ویست و رۆڵه‌ی ئازا و نه‌به‌زی خه‌بات،ی شۆڕشگێڕ و خه‌ڵکی کوردستان، کاک عه‌لی فه‌قێ عیسا، به‌ گولله‌ی هێزه‌کانی رژیم ده‌پێکرێ و شه‌هید ده‌بێ و گیانی به‌رزی به‌ره‌و به‌رزایی باڵ ده‌گرێ و له‌ ئاسمانی ساماڵی هه‌رماندا له‌نگه‌ر ده‌گرێ.

بارانی ره‌حمه‌تی خودا و تاڤگه‌ی سڵاوی خه‌ڵک و خه‌بات بڕژێ به‌سه‌ر گیانی به‌رزی شه‌هید عه‌لی فه‌قێ عیسا.

رێگای پیرۆزی پڕ رێبوار و سه‌نگه‌ری خه‌باتی هه‌ر ئاوه‌دان بێ.