شه‌هید که‌ریم حسێنزاده‌

شـه‌هید که‌ریم حسێنزاده‌

شه‌هید که‌ریم حسێنزاده‌ ناسراو به‌ که‌ریم زه‌ربه‌نه‌یی، کوڕی کاك حسێن خه‌ڵکی گوندی زه‌ربه‌نه‌ له‌ ناوچه‌ی بانه‌. کوڕه‌کوردێکی ده‌ست و دڵپاک و چاک بوو. شه‌هید که‌ریم له‌ ساڵی-١٣٤٣-دا له‌ بنه‌ماڵه‌یه‌کی ڕه‌شایی ئه‌م کوردستانه‌دا چاوی به‌ دنیای بێبه‌شیی و نه‌داری کورده‌واریی هه‌ڵێنا و ئه‌ویش وه‌کوو زۆربه‌ی رۆڵه‌کانی گه‌لی کورد له‌ به‌رهه‌می شیرینی داری به‌به‌ری خوێنده‌واریی بێبه‌ش بوو.

شه‌هید که‌ریم وێڕای باوك و که‌سوکاری هه‌ر که‌ پێگه‌یشت ده‌ستی، له‌جیاتی قه‌ڵه‌م، گۆچان و ده‌سته‌مسته‌ی ئاموور و ده‌سکی داس و کلکی بێڵ و پاچی ناسیی. رۆڵه‌ی نه‌داری کورد بۆ ژیانێکی نه‌مر و نه‌ژی کوردانه‌ ده‌چه‌وسایه‌وه‌ و ره‌نجی ده‌کێشا تا شۆرشی گه‌لانی ئێران دژی رژیمی شایه‌تیی سه‌رکه‌وت و رژیمی تازه‌ به‌ده‌سه‌ڵات گه‌یشتووی خومه‌ینیی هێزی بۆسه‌ر کوردستان هێنا، شه‌هید که‌ریم بۆ به‌ربه‌ره‌کانیی له‌گه‌ڵ هێرشکاران و به‌کرێگیراوانی رژیم چه‌کی شه‌ره‌فی پێشمه‌رگایه‌تیی له‌شان کرد و کاتێک (رێکخراوی خه‌بات) له‌ خه‌رمانانی-١٣٥٩-دا ئیعلامی مه‌وجوودیه‌تی کرد، هاته‌ ناو ریزی پێشمه‌رگه‌کانی خه‌باته‌وه‌ و به‌وپه‌ڕی فیداکاریی و دامه‌زراویی و نه‌زم و نیزامه‌وه‌ ئه‌رکی پیرۆزی پێشمه‌رگایه‌تیی به‌ڕێوه‌ده‌برد، تا له‌ رۆژی-٢٤-ی ره‌شه‌مه‌ی-١٣٦١-دا له‌ شه‌ڕێکی قاره‌مانانه‌دا له‌ گوندی یاکوباوای ناوچه‌ی ده‌شته‌تاڵی بانه‌ له‌ کاتژمێر (ده‌)ی به‌یانییدا به‌ گولله‌ی به‌کرێگیراوه‌کانی رژیم و جاشه‌ خۆرۆشه‌کان پێکرا و گیانی پیرۆزی فیدای گه‌ل و نیشتمان کرد و ئه‌رکی پیرۆزی خه‌بات و تێکۆشانی بۆ هاوسه‌نگه‌رانی به‌جێهێشت. هه‌زاران سڵاو له‌ گیانی پیرۆزی بێ.