شه‌هید خالید عه‌بباسیی

شـه‌هید خـالـیـد عـه‌بـبـاسیی

شه‌هید کاک خالید عه‌بباسیی ساڵی-١٣٤٧-ی کۆچیی- هه‌تاویی له‌ گوندی ”سارتکه‌“ی ناوچه‌ی ”گه‌ورک“ی سه‌رده‌شت له‌ بنه‌ماڵه‌یه‌کی نیشتمانپه‌روه‌ری گه‌له‌که‌ماندا له‌دایک بووه. ته‌مه‌نی منداڵیی هه‌ر له‌و گونده‌ به‌سه‌ربردووه‌. ساڵی-١٣٥٢-له‌ گونده‌که‌ی خۆیان چۆته‌ قوتابخانه‌ و قۆناغی سه‌ره‌تایی به‌ سه‌رکه‌وتنه‌وه‌ ته‌واو کردووه‌، پاشان بۆ درێژه‌دان به‌ خوێندن، ساڵی-١٣٥٧-چۆته‌ شاری سه‌رده‌شت و تا پۆلی دوومی ناوه‌ندیی خوێندوویه‌تی، به‌ڵام سه‌رهه‌ڵدانی شۆڕشی خه‌ڵکی ئێران له‌ دژی رژیمی شایه‌تیی و هاتنه‌سه‌رکاری تاقمی خومه‌ینی و دواتریش که‌ هێرشی سوپای رژیمی تازه‌ به‌ده‌سه‌ڵاتگه‌یشتووی به‌نێو ئیسلامیی نه‌یانهێشت کاک خالید له‌ سه‌رده‌شت درێژه‌ به‌ خوێندن بدا.

هاوکات له‌گه‌ڵ هێرشی سوپا و پاسدار و جاشه‌کانی رژیمی ئێران بۆ گرتنه‌وه‌ی ناوچه‌ ئازادکراوه‌کانی کوردستان، کاک خالید وێڕای ئه‌ندامانی بنه‌ماڵه‌که‌ی ئاواره‌ و په‌ڕیوه‌ی گوند و ناوچه‌کانی دیکه‌ و پاشانیش باشووری کوردستان بوو، تا له‌ کۆتاییدا له‌ شاری سلێمانی گیرسانه‌وه‌. کاک خالید له‌وێش به‌مه‌به‌ستی پێگه‌یاندنی خۆی ده‌ستی به‌ خوێندن کرده‌وه‌ و قۆناغه‌کانی ناوه‌ندیی و دواناوه‌ندیی بڕین تا دیپڵۆمی له‌ لقی پێشه‌سازیی به‌شی ”ئه‌لیکترۆن“ وه‌رگرت.

شه‌هید خالید له‌ بنه‌ماڵه‌یه‌کی خه‌باتگێڕ و پێشمه‌رگه‌دا له‌دایک ببوو، گه‌وره‌ ببوو و پێگه‌یشتبوو، هه‌ر بۆیه‌ له‌ هه‌ڕه‌تی لاوه‌تی و مێرمنداڵییدا بوو به‌ ئه‌ندامی ”خه‌بات“ و وه‌ک رۆڵه‌یه‌کی دڵ پڕ له‌ هیوا و لاوێکی تینووی ئازادیی له‌ ریزه‌کانی ئه‌و رێکخراوه‌ ره‌سه‌ن و خه‌باتگێڕه‌دا، هاوکات له‌گه‌ڵ خوێندن و خۆپێگه‌یاندندا، بۆ رزگاریی خاک و خه‌ڵک ده‌ستی به‌ خه‌بات و تێکۆشان کرد.

  کاک خالید هه‌ر زوو هه‌ستی به‌ به‌شمه‌ینه‌تیی و ژێرده‌سته‌یی گه‌له‌که‌ی کرد، هه‌ر زوو پێشمه‌رگانه‌ ژیان و پێشمه‌رگانه‌ ماڵ و گیان فیداکردن له‌پێناو ئاو و خاک و بیروباوڕدا بوونه‌ هه‌وێنی ژیانی. ئه‌و خونچه‌یه‌کی پشکوتووی کێڵگه‌‌ی به‌پیت و به‌ره‌که‌تی شۆڕش و، رۆڵه‌یه‌کی چیائاسای قاڵبووی کووره‌ی گه‌رم و به‌لرفه‌ی خه‌بات و، چنارێکی سه‌ربڵند و باڵاکردووی که‌شی رۆژانی ره‌شی وڵاتی شه‌هیدستان و شۆڕشستان بوو. ئه‌و له‌ به‌ڕێوه‌بردنی ئه‌رکه‌ رێکخراوه‌ییه‌کاندا رووح سووک، دڵسۆز، به‌مشوور، پشوودرێژ و ماندوویی نه‌ناس بوو. له‌گه‌ڵ ئه‌وه‌دا که‌ ئه‌رکی پیرۆز و گرنگی خوێندن و خۆپه‌روه‌رده‌کردنی له‌سه‌رشان بوو، به‌ڵام هه‌رگیز له‌ کاروباری خه‌بات و جێبه‌جێکردنی ئه‌رکه‌ پێسپێردراوه‌کاندا درێغیی و که‌مته‌رخه‌میی نه‌ده‌کرد و به‌ ته‌واوی توانا و لێهاتوویی خۆی له‌و پێناوه‌دا ئاماده‌ی هه‌موو ئه‌رکێک بوو.

  کاک خالید وێڕای ئه‌وه‌ که‌ سه‌رپه‌رستی بنه‌ماڵه‌که‌ی ده‌کرد،‌ ئه‌وه‌ش ئه‌رکێکی که‌م نه‌بوو، له‌ راستییدا له‌سه‌رپه‌رستیی کردنی بنه‌ماڵه‌ی پێشمه‌رگه‌کاندا هه‌رگیز که‌مته‌رخه‌میی نه‌ده‌کرد و له‌ به‌جێگه‌یاندنی ئه‌رک و داواکانی هیچ کام له‌ بنه‌ماڵه‌کانی پێشمه‌رگه‌کان درێغیی نه‌ده‌کرد و له‌به‌رانبه‌ر داواکانیان خۆی گران نه‌ده‌کرد، به‌ڵکو ئه‌و هه‌میشه‌ به‌ زه‌رده‌خه‌نه‌ و رووی خۆشه‌وه‌ وه‌ڵامی داواکانی ده‌دانه‌وه‌ و به‌پێی تواناش بۆی جێبه‌جێ ده‌کردن. کاک خالید تا له‌ژیاندا مابوو، له‌ قسه‌کردندا رووخۆش و ده‌م به‌ بزه‌، له‌ به‌جێگه‌یاندنی ئه‌رکدا لێزان و دڵسۆز، له‌ یارمه‌تییداندا رووح سووک و پشوودرێژ و له‌ ته‌نگانه‌ و نه‌هامه‌تییدا خۆڕاگر و به‌ئیمان بوو.

داخه‌که‌م دوژمنانی ئه‌م نیشتمانه‌ وێران و سووتمانه‌ دڵیان بڕوای نه‌دا ئه‌و خونچه‌گوڵه‌ی باخچه‌ی ئاوات به‌ ئازادیی بۆن و به‌رامه‌ی خۆی به‌ شاخ و دۆڵ و ئاوه‌دانییه‌کانی وڵاتدا بڵاوبکاته‌وه‌، و هه‌ر زوو چنگی ژاراویی و خوێناویان له گه‌ردنی کێلئاسای تووندکرد و هه‌ڵیانوه‌راند. ئه‌وه‌ بوو له‌ پێشنیوڕۆی رۆژی هه‌ینی-١٦/٣/١٣٧٦-ی ک. هـ (به‌رامبه‌ر به‌-٦/٦/١٩٩٧-ی زایینیی) له‌ناو بازاڕی شاری سلێمانیی باشووری کوردستان به‌ده‌ستی چه‌په‌ڵی تیرۆریستان و به‌کرێگیراوانی کۆماری به‌نێو ئیسلامیی ئێران تیرۆر کرا و به‌ کۆڵێک هیوا و ئاواته‌وه‌ گیانی به‌ گیانئافه‌رین به‌خشی و کۆڕی هاوڕێیانی به‌جێهێشت و ره‌گه‌ڵ کاروانی نه‌پساوه‌ی شه‌هیدانی خه‌بات،ی شۆڕشگێڕ و کوردستان که‌وت و به‌ره‌و مه‌نزڵگای ئه‌به‌دیی که‌وته‌ رێ تا له‌وێ له‌گه‌ڵ کۆڕی هاوبیرانی وه‌فاداری پێشوازیی له‌ باوک و رابه‌ر و سه‌رکرده‌ی شه‌هید، مامۆستا مه‌لا خدری عه‌بباسی، بکه‌ن.

  هه‌زاران سڵاو له‌ گیانی پاکی شه‌هید خالید عه‌بباسیی و تێکڕای شه‌هیدانی رێگای ئازادیی. خودای گه‌وره‌ گیانیان به‌ به‌هه‌شتی به‌رینی خۆی شاد بکا و پشتیوان و یارمه‌تییده‌ری هاوبیر و رێبوارانیان بێ!.